nazar itab sarapa mizaj barham hai

nazar itaab sarāpā mizāj barham hai

zahe-nasīb ye ehsān-e-husn kyā kam hai

nafas nafas meñ ka.ī inqalāb pinhāñ haiñ

nazar nazar meñ tirī bijliyoñ kā aalam hai

ham apnī koshish-e-paiham se baaz kyoñ aa.eñ

abhī to pesh-e-nazar ye nizām-e-ālam hai

umiid thī ki masarrat ke giit gā.eñge

magar hanūz zabāñ par fasāna-e-ġham hai

kabhī to yaas kī duniyā badal hī jā.egī

ye dekhnā hai hamārā bhī azm mohkam hai

urūs-e-dahr kī zulfeñ sañvārne vaalo

kuchh apne hāl-e-pareshāñ kā bhī tumheñ ġham hai

nikal rahī hai har ik dil se aah ai 'faizī'

tirī ġhazal kā har ik sher nashtar-e-ġham hai

nazar itab sarapa mizaj barham hai

zahe-nasib ye ehsan-e-husn kya kam hai

nafas nafas mein kai inqalab pinhan hain

nazar nazar mein teri bijliyon ka aalam hai

hum apni koshish-e-paiham se baz kyon aaen

abhi to pesh-e-nazar ye nizam-e-alam hai

umid thi ki masarrat ke git gaenge

magar hanuz zaban par fasana-e-gham hai

kabhi to yas ki duniya badal hi jaegi

ye dekhna hai hamara bhi azm mohkam hai

urus-e-dahr ki zulfen sanwarne walo

kuchh apne haal-e-pareshan ka bhi tumhein gham hai

nikal rahi hai har ek dil se aah ai 'faizi'

teri ghazal ka har ek sher nashtar-e-gham hai