nazar jab se kisi ki mehrban malum hoti hai

nazar jab se kisī kī mehrbāñ ma.alūm hotī hai

ye duniyā gulsitāñ-dar-gulsitāñ ma.alūm hotī hai

sazā har jurm kī manzūr hai mujh ko magar ye kyā

ki har laġhzish pe fitrat ham-zabāñ ma.alūm hotī hai

vahāñ apnā safīna le chalī huuñ maiñ Dubone ko

jahāñ har mauj bahr-e-be-karāñ ma.alūm hotī hai

ga.e vo din kī lutf aatā thā kāñToñ se ulajhne meñ

hañsī bhī ab to phūloñ kī garāñ ma.alūm hotī hai

ye kis jannat meñ le aayā hai paimān-e-vafā dil ko

ki har sūrat yahāñ ārām-e-jāñ ma.alūm hotī hai

jo guzrī hai kisī ke saath is umr-e-do-roza meñ

vo saa.at nāz-e-umr-e-jāvedāñ ma.alūm hotī hai

nazar jab se kisi ki mehrban malum hoti hai

ye duniya gulsitan-dar-gulsitan malum hoti hai

saza har jurm ki manzur hai mujh ko magar ye kya

ki har laghzish pe fitrat ham-zaban malum hoti hai

wahan apna safina le chali hun main Dubone ko

jahan har mauj bahr-e-be-karan malum hoti hai

gae wo din ki lutf aata tha kanTon se ulajhne mein

hansi bhi ab to phulon ki garan malum hoti hai

ye kis jannat mein le aaya hai paiman-e-wafa dil ko

ki har surat yahan aaram-e-jaan malum hoti hai

jo guzri hai kisi ke sath is umr-e-do-roza mein

wo saat naz-e-umr-e-jawedan malum hoti hai