nazar jhuki hai ye sar tumhaara agar jhuka hai

nazar jhukī hai ye sar tumhārā agar jhukā hai

nazar se girne ke baad koī kahāñ uThā hai

yaqīñ nahīñ gar laboñ ko izn-e-kalām de ab

tumhāre hoñToñ pe naam merā kahīñ rukā hai

asīr-zāde sabhī qafas ke himāyatī haiñ

ġhulām-zāde raheñge āḳhir yahī sazā hai

ḳhudārā tohmat lagā nahīñ maiñ vahāñ nahīñ thā

jahāñ qabīla tirī anāoñ kā jā luTā hai

duā ke pardoñ meñ dard ginñe lagā to dekhā

ki dard-e-ishqāñ har ek dukh meñ chhupā huā hai

bhalā maiñ dāġh-e-mafāriqat kī misāl kyā duuñ

ye daaġh jis ko lagā vo suulī chaḌhā diyā hai

kuchal hī Daalā hai dard-e-hijrāñ kī āhaToñ ne

mire ḳhayāloñ ne vasl-lamha agar bunā hai

ġhazal gavāh hai koī nahīñ hai tumhārā saanī

'ḳhalīl' terā suḳhan taḳhayyul se māvarā hai

nazar jhuki hai ye sar tumhaara agar jhuka hai

nazar se girne ke baad koi kahan uTha hai

yaqin nahin gar labon ko izn-e-kalam de ab

tumhaare honTon pe nam mera kahin ruka hai

asir-zade sabhi qafas ke himayati hain

ghulam-zade rahenge aaKHir yahi saza hai

KHudara tohmat laga nahin main wahan nahin tha

jahan qabila teri anaon ka ja luTa hai

dua ke pardon mein dard ginne laga to dekha

ki dard-e-ishqan har ek dukh mein chhupa hua hai

bhala main dagh-e-mafariqat ki misal kya dun

ye dagh jis ko laga wo suli chaDha diya hai

kuchal hi Dala hai dard-e-hijran ki aahaTon ne

mere KHayalon ne wasl-lamha agar buna hai

ghazal gawah hai koi nahin hai tumhaara sani

'KHalil' tera suKHan taKHayyul se mawara hai