nazar jo aaya us pe eatibar kar liya gaya

nazar jo aayā us pe e.atibār kar liyā gayā

haqīqatoñ ke dark se farār kar liyā gayā

quyūd-e-āgahī se jab sahm ga.iiñ jibillateñ

nazar ke gird rañg kā hisār kar liyā gayā

shuhūd kī jo sat.h pe anāniyat kā shor uThā

to dāman-e-ḳhudī ko tār-tār kar liyā gayā

gumāñ huā ki rāsta abhī mirī nazar meñ hai

sharīr shutr-nafs be-mahār kar liyā gayā

jo log dil kī uljhanoñ meñ ġharq the ḳhamosh the

unheñ bhī ahl-e-jazb meñ shumār kar liyā gayā

rah-e-talab kī saḳhtiyoñ ke shikve lab-ba-lab hue

surūr-e-jidd-o-jahd ko ḳhumār kar liyā gayā

chale kabhī kabhī udhar se azmatoñ ke qāfile

vafā kā azm jin se pā.edār kar liyā gayā

vo ishq thā ki bandagī zarūrateñ kī āgahī

bas ek rabt thā jo ustuvār kar liyā gayā

varaq varaq rumūz-e-āgahī ke the likhe hue

kutub ko bār-e-pusht-bar-himār kar liyā gayā

usuul aur furūa sab 'shahāb' ek taraf hue

ajab nizām-e-zīst iḳhtiyār kar liyā gayā

nazar jo aaya us pe eatibar kar liya gaya

haqiqaton ke dark se farar kar liya gaya

quyud-e-agahi se jab sahm gain jibillaten

nazar ke gird rang ka hisar kar liya gaya

shuhud ki jo sath pe ananiyat ka shor uTha

to daman-e-KHudi ko tar-tar kar liya gaya

guman hua ki rasta abhi meri nazar mein hai

sharir shutr-nafs be-mahaar kar liya gaya

jo log dil ki uljhanon mein gharq the KHamosh the

unhen bhi ahl-e-jazb mein shumar kar liya gaya

rah-e-talab ki saKHtiyon ke shikwe lab-ba-lab hue

surur-e-jidd-o-jahd ko KHumar kar liya gaya

chale kabhi kabhi udhar se azmaton ke qafile

wafa ka azm jin se paedar kar liya gaya

wo ishq tha ki bandagi zaruraten ki aagahi

bas ek rabt tha jo ustuwar kar liya gaya

waraq waraq rumuz-e-agahi ke the likhe hue

kutub ko bar-e-pusht-bar-himar kar liya gaya

usul aur furua sab 'shahab' ek taraf hue

ajab nizam-e-zist iKHtiyar kar liya gaya