nazar ka nashsha badan ka KHumar TuT gaya

nazar kā nashsha badan kā ḳhumār TuuT gayā

ki ab vo ā.īna-e-e'tibār TuuT gayā

batā.eñ kyā tumheñ ab lamha-e-qarār kī baat

zarā sī der ko chamkā sharār TuuT gayā

koī ḳhayāl hai saa.e kī tarah saath mire

akele-pan kā bhī mere hisār TuuT gayā

shikast khaa.ī na maiñ ne fareb duniyā se

dil is nabard meñ go baar baar TuuT gayā

uTho ki aur koī rishta ustuvār kareñ

jise thā TūTnā 'tāriq' vo taar TuuT gayā

nazar ka nashsha badan ka KHumar TuT gaya

ki ab wo aaina-e-e'tibar TuT gaya

bataen kya tumhein ab lamha-e-qarar ki baat

zara si der ko chamka sharar TuT gaya

koi KHayal hai sae ki tarah sath mere

akele-pan ka bhi mere hisar TuT gaya

shikast khai na main ne fareb duniya se

dil is nabard mein go bar bar TuT gaya

uTho ki aur koi rishta ustuwar karen

jise tha TuTna 'tariq' wo tar TuT gaya