nazar ke tir se dil ka shikar karte hain

nazar ke tiir se dil kā shikār karte haiñ

ham is jahāñ meñ yahī kārobār karte haiñ

tumhārī zulf kī ḳhushbū kā tazkira kar ke

fazā-e-vaqt ko ham mushk-bār karte haiñ

hamāre shahr se ruḳhsat hue ho jis din se

tumhāre aane kā ham intizār karte haiñ

daġhā fareb kā ḳhadsha nahīñ rahe ham ko

yahī to soch ke bachchoñ se pyaar karte haiñ

purānī rasmoñ kī zanjīr toḌ kar ab ham

nayā usuul koī iḳhtiyār karte haiñ

shumār kar na sake koī shaḳhs duniyā meñ

ḳhatā.eñ is liye vo be-shumār karte haiñ

ġhamoñ kī bhiiḌ se bāhar nikal ke ai 'tal.at'

fazā-e-qalb ko ham ḳhush-gavār karte haiñ

nazar ke tir se dil ka shikar karte hain

hum is jahan mein yahi karobar karte hain

tumhaari zulf ki KHushbu ka tazkira kar ke

faza-e-waqt ko hum mushk-bar karte hain

hamare shahr se ruKHsat hue ho jis din se

tumhaare aane ka hum intizar karte hain

dagha fareb ka KHadsha nahin rahe hum ko

yahi to soch ke bachchon se pyar karte hain

purani rasmon ki zanjir toD kar ab hum

naya usul koi iKHtiyar karte hain

shumar kar na sake koi shaKHs duniya mein

KHataen is liye wo be-shumar karte hain

ghamon ki bhiD se bahar nikal ke ai 'talat'

faza-e-qalb ko hum KHush-gawar karte hain