nazar ko waqf-e-gham-e-intizar kar na sake

nazar ko vaqf-e-ġham-e-intizār kar na sake

ḳhud apnī zaat pe ham e.atibār kar na sake

nazar uThī to guloñ tak hī rah ga.ī mahdūd

nazar ko mā.il-e-rang-e-bahār kar na sake

fareb-e-husn se is ko na kyoñ karūñ ta.abīr

zabāñ se kahte rahe dil se pyaar kar na sake

qafas meñ aaya to mausam bahār kā lekin

nigāh-e-shauq ko vaqf-e-bahār kar na sake

harīm-e-nāz ke parde uThe magar 'paikar'

junūñ ke maare hī ḳhud intizār kar na sake

nazar ko waqf-e-gham-e-intizar kar na sake

KHud apni zat pe hum eatibar kar na sake

nazar uThi to gulon tak hi rah gai mahdud

nazar ko mail-e-rang-e-bahaar kar na sake

fareb-e-husn se is ko na kyon karun tabir

zaban se kahte rahe dil se pyar kar na sake

qafas mein aaya to mausam bahaar ka lekin

nigah-e-shauq ko waqf-e-bahaar kar na sake

harim-e-naz ke parde uThe magar 'paikar'

junun ke mare hi KHud intizar kar na sake