nazar koi nahin aata hai mehrban mujhko

nazar koī nahīñ aatā hai mehrbāñ mujh ko

dayār-e-ġhair sā lagtā hai gulsitāñ mujh ko

mujhe to karnī hai ta.amīr-e-gulsitāñ phir se

agar sukūn se rahne de āsmāñ mujh ko

hazār baar zamāne ne karvaTeñ badlīñ

miTā sakī na kabhī gardish-e-jahāñ mujh ko

ajiib baat hai jo ham-safar haiñ sadiyoñ se

samajh rahe haiñ vahī gard-e-kārvāñ mujh ko

yahāñ na dost kisī kā na koī dushman hai

burā ho yaas kā le aa.ī hai kahāñ mujh ko

chhupā.e dost mirā āstīñ meñ ḳhanjar thā

na ho sakā kisī sūrat bhī ye gumāñ mujh ko

jo mere dard kā darmāñ 'nazīr' batlātā

milegā ab vo masīhā-nafas kahāñ mujh ko

nazar koi nahin aata hai mehrban mujh ko

dayar-e-ghair sa lagta hai gulsitan mujh ko

mujhe to karni hai tamir-e-gulsitan phir se

agar sukun se rahne de aasman mujh ko

hazar bar zamane ne karwaTen badlin

miTa saki na kabhi gardish-e-jahan mujh ko

ajib baat hai jo ham-safar hain sadiyon se

samajh rahe hain wahi gard-e-karwan mujh ko

yahan na dost kisi ka na koi dushman hai

bura ho yas ka le aai hai kahan mujh ko

chhupae dost mera aastin mein KHanjar tha

na ho saka kisi surat bhi ye guman mujh ko

jo mere dard ka darman 'nazir' batlata

milega ab wo masiha-nafas kahan mujh ko