nazar mein aa gai jab se janab ki surat

nazar meñ aa ga.ī jab se janāb kī sūrat

badal ga.ī dil-e-ḳhāna-ḳharāb kī sūrat

bharā huā hai ḳhum-e-dil mai-e-mohabbat se

tumhārī aañkh hai jām-e-sharāb kī sūrat

hamesha ek hī hālat nahīñ zamāna kī

hamārī ziist yahāñ hai habāb kī sūrat

lagī hai aag yahāñ tak kisī kī ulfat meñ

bane haiñ qalb-o-jigar bhī kabāb kī sūrat

na jā tū zāhid-e-nādān sū-e-mai-ḳhāna

bigaḌ na jaa.e kisī din janāb kī sūrat

hamāre ashk ne rang-e-hinā ko maat kiyā

bahe haiñ aañkh se aañsū shahāb kī sūrat

jalā diyā dil-e-mai-kash ko mere saaqī ne

jigar kabāb lahū se sharāb kī sūrat

ba-vaqt-e-naza.a 'qamar' aur lahad ke andar bhī

ho mere pesh-e-nazar bū-turāb kī sūrat

nazar mein aa gai jab se janab ki surat

badal gai dil-e-KHana-KHarab ki surat

bhara hua hai KHum-e-dil mai-e-mohabbat se

tumhaari aankh hai jam-e-sharab ki surat

hamesha ek hi haalat nahin zamana ki

hamari zist yahan hai habab ki surat

lagi hai aag yahan tak kisi ki ulfat mein

bane hain qalb-o-jigar bhi kabab ki surat

na ja tu zahid-e-nadan su-e-mai-KHana

bigaD na jae kisi din janab ki surat

hamare ashk ne rang-e-hina ko mat kiya

bahe hain aankh se aansu shahab ki surat

jala diya dil-e-mai-kash ko mere saqi ne

jigar kabab lahu se sharab ki surat

ba-waqt-e-naza 'qamar' aur lahad ke andar bhi

ho mere pesh-e-nazar bu-turab ki surat