nazar mein loch na haijaan manzaron mein hai

nazar meñ loch na haijān manzaroñ meñ hai

urūh-e-sub.h abhī shab kī chādaroñ meñ hai

na soch tājvaroñ ka ma.aal kyā hogā

ye dekh tesha-ba-kaf kaun pattharoñ meñ hai

bhaḌak rahī haiñ kināroñ kī bastiyāñ ab tak

balā kī aag hamāre samundaroñ meñ hai

nigār-ḳhāna-e-ma.anī se sarsarī na guzar

lahū ka rañg bhī do-chār manzaroñ meñ hai

sukūt-e-sañg ko āsā.ish-e-bayāñ de de

ajab kamāl-e-hunar ā.īna-garoñ meñ hai

galī ke moḌ pe kis ne diyā jalāyā thā

usī key raushnī tārīk se gharoñ meñ hai

nigal na jaa.eñ use bhī ye kaj-kulāh 'urūj'

zarā sī aan jo baaqī suḳhnavaroñ meñ hai

nazar mein loch na haijaan manzaron mein hai

uruh-e-subh abhi shab ki chadaron mein hai

na soch tajwaron ka maal kya hoga

ye dekh tesha-ba-kaf kaun pattharon mein hai

bhaDak rahi hain kinaron ki bastiyan ab tak

bala ki aag hamare samundaron mein hai

nigar-KHana-e-mani se sarsari na guzar

lahu ka rang bhi do-chaar manzaron mein hai

sukut-e-sang ko aasaish-e-bayan de de

ajab kamal-e-hunar aaina-garon mein hai

gali ke moD pe kis ne diya jalaya tha

usi key raushni tarik se gharon mein hai

nigal na jaen use bhi ye kaj-kulah 'uruj'

zara si aan jo baqi suKHnawaron mein hai