nazar milte hi barse ashk-e-KHun kyun dida-e-tar se

nazar milte hī barse ashk-e-ḳhūñ kyuuñ dīda-e-tar se

rageñ qalb-o-jigar kī chheḌ diiñ kyā tum ne nashtar se

yaqīnan kuchh ta'alluq hai tire dar ko mire sar se

vagarna lauh-e-peshānī kā kyā rishta hai patthar se

mire pahlū meñ hai ābād armānoñ kī ek duniyā

hazāroñ mayyateñ uTheñgī mire saath bistar se

vo apnī zulf bikhrā kar tasavvur hī meñ aa jaate

ye saaya bhī uThā ab to mirī ummīd ke sar se

vafā ne hasrat-e-kushta kā us ko ḳhūñ-bahā samjhā

girā jo ashk dāman par lahū kā dīda-e-tar se

sunā.ūñ tum ko vo lafzoñ meñ hāl-e-ḳhūbī-e-qismat

mire dāman pe barse bhī to ashkoñ ke guhar barse

mirī hastī miTāne vaale shāyad tū nahīñ vāqif

ki miT kar bhī banegī ek duniyā mere paikar se

ḳhayāl-e-ābla-pā.ī 'vaqār' ik uzr-e-be-jā thā

na ghar thā duur manzil se na manzil duur thī ghar se

nazar milte hi barse ashk-e-KHun kyun dida-e-tar se

ragen qalb-o-jigar ki chheD din kya tum ne nashtar se

yaqinan kuchh ta'alluq hai tere dar ko mere sar se

wagarna lauh-e-peshani ka kya rishta hai patthar se

mere pahlu mein hai aabaad armanon ki ek duniya

hazaron mayyaten uThengi mere sath bistar se

wo apni zulf bikhra kar tasawwur hi mein aa jate

ye saya bhi uTha ab to meri ummid ke sar se

wafa ne hasrat-e-kushta ka us ko KHun-baha samjha

gira jo ashk daman par lahu ka dida-e-tar se

sunaun tum ko wo lafzon mein haal-e-KHubi-e-qismat

mere daman pe barse bhi to ashkon ke guhar barse

meri hasti miTane wale shayad tu nahin waqif

ki miT kar bhi banegi ek duniya mere paikar se

KHayal-e-abla-pai 'waqar' ek uzr-e-be-ja tha

na ghar tha dur manzil se na manzil dur thi ghar se