nazar-navāz nazāroñ meñ jī nahīñ lagtā
bichhaḌ ke tujh se bahāroñ meñ jī nahīñ lagtā
vo māhtāb huā jab se badliyoñ meñ qaid
damakte chāñd sitāroñ meñ jī nahīñ lagtā
za.iif baap javāñ beToñ se hirāsāñ haiñ
ab us kā apne hī pyāroñ meñ jī nahīñ lagtā
sabhī ko mahfil-e-raqs-o-surūr hai darkār
kisī kā dard ke māroñ meñ jī nahīñ lagtā
ham apne gaañv meñ tanhā bhī mast rahte the
ye shahr hai ki hazāroñ meñ jī nahīñ lagtā
sab apne dost haiñ koī kisī kā dost nahīñ
ye jab se jaanā hai yāroñ meñ jī nahīñ lagtā
chalo basā.eñ kisī barf-zār ko 'shībān'
ab aag ugalte dayāroñ meñ jī nahīñ lagtā
nazar-nawaz nazaron mein ji nahin lagta
bichhaD ke tujh se bahaaron mein ji nahin lagta
wo mahtab hua jab se badliyon mein qaid
damakte chand sitaron mein ji nahin lagta
zaif bap jawan beTon se hirasan hain
ab us ka apne hi pyaron mein ji nahin lagta
sabhi ko mahfil-e-raqs-o-surur hai darkar
kisi ka dard ke maron mein ji nahin lagta
hum apne ganw mein tanha bhi mast rahte the
ye shahr hai ki hazaron mein ji nahin lagta
sab apne dost hain koi kisi ka dost nahin
ye jab se jaana hai yaron mein ji nahin lagta
chalo basaen kisi barf-zar ko 'shiban'
ab aag ugalte dayaron mein ji nahin lagta
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
