nazar ne kaam kiya dil ke tarjuman ki tarah

nazar ne kaam kiyā dil ke tarjumāñ kī tarah

nigāheñ kah ga.ī sab hāl-e-dil zabāñ kī tarah

kiye the be-ḳhudī-e-shauq meñ jahāñ sajde

vahī zamīñ nazar aatī hai āsmāñ kī tarah

nazar milī hai to pahchān jaa.e ahl-e-chaman

dikhā.ī dete haiñ gulchīñ bhī bāġhbāñ kī tarah

kitāb-e-zīst kā shīrāza-band koī nahīñ

bikhar ga.ī hai kisī nazm-e-bostān kī tarah

na barg-o-bār na shādābiyāñ na ġhuncha-o-gul

yahī bahār agar hai to hai ḳhizāñ kī tarah

tumhāre shahr meñ muddat se ye tamannā hai

dikhā.ī de koī be-mehr mehrbāñ kī tarah

ḳhudā-gavāh ki ik umr kā asāsa hai

na kyuuñ aziiz rakhūñ ilm-o-fan ko jaañ kī tarah

kise batā.eñ ki the ham bhī ham-nashīñ ai 'saif'

vo 'tāj' bhuul ga.e yād-e-raftagāñ kī tarah

nazar ne kaam kiya dil ke tarjuman ki tarah

nigahen kah gai sab haal-e-dil zaban ki tarah

kiye the be-KHudi-e-shauq mein jahan sajde

wahi zamin nazar aati hai aasman ki tarah

nazar mili hai to pahchan jae ahl-e-chaman

dikhai dete hain gulchin bhi baghban ki tarah

kitab-e-zist ka shiraaza-band koi nahin

bikhar gai hai kisi nazm-e-bostan ki tarah

na barg-o-bar na shadabiyan na ghuncha-o-gul

yahi bahaar agar hai to hai KHizan ki tarah

tumhaare shahr mein muddat se ye tamanna hai

dikhai de koi be-mehr mehrban ki tarah

KHuda-gawah ki ek umr ka asasa hai

na kyun aziz rakhun ilm-o-fan ko jaan ki tarah

kise bataen ki the hum bhi ham-nashin ai 'saif'

wo 'taj' bhul gae yaad-e-raftagan ki tarah