nazar nishane pe thi tir bhi kaman mein tha

nazar nishāne pe thī tiir bhī kamān meñ thā

havā chalegī achānak kahāñ gumān meñ thā

mujhe bhī karnā vahī thā jo kar diyā us ne

pe ek ḳhauf-e-ḳhudā thā jo darmiyān meñ thā

zamīñ kā boyā bhī kyā āsmāñ pe kaTnā thā

kiye dhare kā natīja isī jahān meñ thā

hazār rang the jo dasht meñ bhaTakte the

aur ek lams baḌī der se machān meñ thā

maiñ ek umr falak par nazar jamā.e rahā

palaT ke dekhā to vo mere hī makān meñ thā

so ḳhāndān kī saarī duā.eñ merī thiiñ

duāoñ ke liye bas maiñ hī ḳhāndān meñ thā

hamārī umr thī 'sābir' dhuāñ uḌāne kī

ḳhabar nahīñ thī ki hāsil to ḳhāk-dān meñ thā

nazar nishane pe thi tir bhi kaman mein tha

hawa chalegi achanak kahan guman mein tha

mujhe bhi karna wahi tha jo kar diya us ne

pe ek KHauf-e-KHuda tha jo darmiyan mein tha

zamin ka boya bhi kya aasman pe kaTna tha

kiye dhare ka natija isi jahan mein tha

hazar rang the jo dasht mein bhaTakte the

aur ek lams baDi der se machan mein tha

main ek umr falak par nazar jamae raha

palaT ke dekha to wo mere hi makan mein tha

so KHandan ki sari duaen meri thin

duaon ke liye bas main hi KHandan mein tha

hamari umr thi 'sabir' dhuan uDane ki

KHabar nahin thi ki hasil to KHak-dan mein tha