nazar se dur hain dil se juda na hum hain na tum

nazar se duur haiñ dil se judā na ham haiñ na tum

gila kareñ bhī to kyā be-vafā na ham haiñ na tum

ham ik varaq pe to haiñ do hurūf kī sūrat

magar nasīb kā likkhā huā na ham haiñ na tum

hamārī zindagī parchhā.iyoñ kī ḳhāmoshī

qarīb laatī hai jo vo sadā na ham haiñ na tum

ham ek saath haiñ jab se ye rog haiñ tab se

kisī bhī rog kī lekin davā na ham haiñ na tum

hamāre jism haiñ paanī pe jaise tasvīreñ

bikharte rañgoñ ke dukh kā sila na ham haiñ na tum

duhā.iyāñ jo nahīñ deñ 'zafar' sitam sah kar

samajh rahī hai ye duniyā ḳhafā na ham haiñ na tum

nazar se dur hain dil se juda na hum hain na tum

gila karen bhi to kya be-wafa na hum hain na tum

hum ek waraq pe to hain do huruf ki surat

magar nasib ka likkha hua na hum hain na tum

hamari zindagi parchhaiyon ki KHamoshi

qarib lati hai jo wo sada na hum hain na tum

hum ek sath hain jab se ye rog hain tab se

kisi bhi rog ki lekin dawa na hum hain na tum

hamare jism hain pani pe jaise taswiren

bikharte rangon ke dukh ka sila na hum hain na tum

duhaiyan jo nahin den 'zafar' sitam sah kar

samajh rahi hai ye duniya KHafa na hum hain na tum