nazar se ho ke wo dil mein utarna chahta hai

nazar se ho ke vo dil meñ utarnā chāhtā hai

phir is ke ba.ad lahū meñ bikharnā chāhtā hai

ḳhabar karo ye siyah-rāt ke asīroñ ko

sahar qarīb hai sūraj ubharnā chāhtā hai

jo raushnī-o-mohabbat kā isti.āra hai

usī parind ke vo par katarnā chāhtā hai

nigār-ḳhāne se kahiye zarā sañbhal ke rahe

vo aa.ine ke muqābil sañvarnā chāhtā hai

zamīñ se kaT ke ḳhalā meñ rahā jo mahv-e-safar

vahī sitāra zamīñ par utarnā chāhtā hai

ḳhabar milī hai mujhe sakinān-e-sahrā se

vo āhū-chashm idhar se guzarnā chāhtā hai

ḳhabar bhī hai ki tumhārā 'niyāz' sho.ala-navā

hudūd-e-jism se bāhar bikharnā chāhtā hai

nazar se ho ke wo dil mein utarna chahta hai

phir is ke baad lahu mein bikharna chahta hai

KHabar karo ye siyah-raat ke asiron ko

sahar qarib hai suraj ubharna chahta hai

jo raushni-o-mohabbat ka istiara hai

usi parind ke wo par katarna chahta hai

nigar-KHane se kahiye zara sanbhal ke rahe

wo aaine ke muqabil sanwarna chahta hai

zamin se kaT ke KHala mein raha jo mahw-e-safar

wahi sitara zamin par utarna chahta hai

KHabar mili hai mujhe sakinan-e-sahra se

wo aahu-chashm idhar se guzarna chahta hai

KHabar bhi hai ki tumhaara 'niyaz' shoala-nawa

hudud-e-jism se bahar bikharna chahta hai