nazar se safha-e-alam pe KHunin dastan likhiye

nazar se safha-e-ālam pe ḳhūnīñ dāstāñ likhiye

qalam se kyā hikāyāt-e-zamīn-o-āsmāñ likhiye

miTā de jo fazā kī tīrgī māhaul kī pastī

koī aisā bhī sher ai shā.irān-e-ḳhush-bayāñ likhiye

bapā haiñ har jihat meñ ātish-o-āhan ke hañgāme

kahāñ is daur meñ jaur-o-jafā-e-mahvashāñ likhiye

ḳhatar-hā-e-rah-e-majnūñ kā qissa kyuuñ bayāñ kījiye

nazar ko nāqa-e-lailā ḳhirad ko sārbāñ likhiye

yahī haiñ yādgār-e-ġhuncha-o-gul is zamāne meñ

inhīñ sūkhe hue kāñToñ se zikr-e-gulsitāñ likhiye

bayāñ karne ko hai tarz-e-tapāk-e-dostāñ kaafī

ab is duniyā meñ kyā rañg-e-ġhurūr-e-dushmanāñ likhiye

rivāyāt-e-kuhan meñ dilkashī baaqī nahīñ 'aḳhtar'

na.e andāz se tārīḳh-e-shahr-e-gul-ruḳhāñ likhiye

nazar se safha-e-alam pe KHunin dastan likhiye

qalam se kya hikayat-e-zamin-o-asman likhiye

miTa de jo faza ki tirgi mahaul ki pasti

koi aisa bhi sher ai shairan-e-KHush-bayan likhiye

bapa hain har jihat mein aatish-o-ahan ke hangame

kahan is daur mein jaur-o-jafa-e-mahwashan likhiye

KHatar-ha-e-rah-e-majnun ka qissa kyun bayan kijiye

nazar ko naqa-e-laila KHirad ko sarban likhiye

yahi hain yaadgar-e-ghuncha-o-gul is zamane mein

inhin sukhe hue kanTon se zikr-e-gulsitan likhiye

bayan karne ko hai tarz-e-tapak-e-dostan kafi

ab is duniya mein kya rang-e-ghurur-e-dushmanan likhiye

riwayat-e-kuhan mein dilkashi baqi nahin 'aKHtar'

nae andaz se tariKH-e-shahr-e-gul-ruKHan likhiye