nazir kah ki na kah be-nazir kitna hun

'nazīr' kah ki na kah be-nazīr kitnā huuñ

misāl de ki maiñ raushan-zamīr kitnā huuñ

tū merī vaz.a-e-faqīrī pe unglī na uThā

baġhair samjhe ki dil kā amiir kitnā huuñ

parakh sakeñ na mujhe jauharī nigāheñ bhī

maiñ ūñchī zaat kā hiirā haqīr kitnā huuñ

kamān khīñch ke baiThā huuñ aaj lafzoñ kī

vo jaan jā.egā dil kā sharīr kitnā huuñ

chhuḌā sakā na ġham-e-dahr se kisī ko hanūz

maiñ apnī zaat ke ġham meñ asiir kitnā huuñ

mirī hayāt kā nauha bhī kyā ḳhabar degā

hisār-e-karb-o-balā meñ asiir kitnā huuñ

panāh-gāh-e-sukūñ DhūñDhtā huuñ gām-ba-gām

azāb-e-zīst meñ lipTā 'nazīr' kitnā huuñ

'nazir' kah ki na kah be-nazir kitna hun

misal de ki main raushan-zamir kitna hun

tu meri waza-e-faqiri pe ungli na uTha

baghair samjhe ki dil ka amir kitna hun

parakh saken na mujhe jauhari nigahen bhi

main unchi zat ka hira haqir kitna hun

kaman khinch ke baiTha hun aaj lafzon ki

wo jaan jaega dil ka sharir kitna hun

chhuDa saka na gham-e-dahr se kisi ko hanuz

main apni zat ke gham mein asir kitna hun

meri hayat ka nauha bhi kya KHabar dega

hisar-e-karb-o-bala mein asir kitna hun

panah-gah-e-sukun DhunDhta hun gam-ba-gam

azab-e-zist mein lipTa 'nazir' kitna hun