nazm KHabron ko kiya aur na latife likkhe

nazm ḳhabroñ ko kiyā aur na latīfe likkhe

maiñ ne ash.ār meñ jiine ke salīqe likkhe

martabe ahl-e-suḳhan ke tumheñ tai karne haiñ

kis ne haq baat kahī kis ne qasīde likkhe

sab ko tadbīr bhī karne ko vahī kahtā hai

aur haiñ sab ke muqaddar bhī usī ke likkhe

shiddat-e-mehr se dī us ke ġhazab ko tashbīh

us kī rahmat ko agar fazl ke saa.e likkhe

kuchh zarūr un meñ nasīhat thī magar yaad nahīñ

jo paḌhe the vo buzurgoñ ke maqūle likkhe

zindagī tujh pe likhūñgā na ziyāda ab kuchh

jo bhī mazmūn tirī mad.h meñ likkhe likkhe

likhtā rahtā hai vahī harf-e-ta.alluq 'aḳhtar'

us se kah do ki ab is baat se aage likkhe

nazm KHabron ko kiya aur na latife likkhe

main ne ashaar mein jine ke saliqe likkhe

martabe ahl-e-suKHan ke tumhein tai karne hain

kis ne haq baat kahi kis ne qaside likkhe

sab ko tadbir bhi karne ko wahi kahta hai

aur hain sab ke muqaddar bhi usi ke likkhe

shiddat-e-mehr se di us ke ghazab ko tashbih

us ki rahmat ko agar fazl ke sae likkhe

kuchh zarur un mein nasihat thi magar yaad nahin

jo paDhe the wo buzurgon ke maqule likkhe

zindagi tujh pe likhunga na ziyaada ab kuchh

jo bhi mazmun teri madh mein likkhe likkhe

likhta rahta hai wahi harf-e-talluq 'aKHtar'

us se kah do ki ab is baat se aage likkhe