nazr-e-qatil ho gai sari ki sari zindagi

nazr-e-qātil ho ga.ī saarī kī saarī zindagī

is liye roz-e-azal se thī hamārī zindagī

vasl nā-mumkin huā uThtā nahīñ hai hijr-e-yār

ho ga.ī hai in dinoñ be-iḳhtiyārī zindagī

ho gayā hai sard ab bāzār-e-saudā-e-junūñ

mil ga.ī qismat ko ik ġhaflat-shi.ārī zindagī

ik gul-e-ḳhūbī kī ulfat ne dikhāyā ye asar

dāġh-e-dil se ban ga.ī phūloñ kī kyārī zindagī

ai 'sharārat' abru-e-jānāñ kī ulfat hai hameñ

kaTtī hai teġh-e-do-dam par ab hamārī zindagī

nazr-e-qatil ho gai sari ki sari zindagi

is liye roz-e-azal se thi hamari zindagi

wasl na-mumkin hua uThta nahin hai hijr-e-yar

ho gai hai in dinon be-iKHtiyari zindagi

ho gaya hai sard ab bazar-e-sauda-e-junun

mil gai qismat ko ek ghaflat-shiari zindagi

ek gul-e-KHubi ki ulfat ne dikhaya ye asar

dagh-e-dil se ban gai phulon ki kyari zindagi

ai 'shararat' abru-e-jaanan ki ulfat hai hamein

kaTti hai tegh-e-do-dam par ab hamari zindagi