nazren jhuki sawal pe mere jawab mein

nazreñ jhukī savāl pe mere javāb meñ

kyā kyā na kah ga.ī hai nigāheñ hijāb meñ

mizrāb hī se saaz meñ hai saarī naġhmagī

hai zindagī kā lutf nihāñ iztirāb meñ

rāh-e-vafā meñ us ke qadam Dagmagā.eñ kyoñ

dekhā hai jis ne terā karam bhī itaab meñ

sadqe nigāh-e-nāz ke huuñ be-niyāz-e-jām

aa.e ye kaif-e-husn kahāñ se sharāb meñ

maiñ rah-navard-e-shauq huuñ mujh ko kahāñ ye hosh

rāhat meñ guzre dil ki ye guzre azaab meñ

rah rah ke ab rulātī hai piirī meñ un kī yaad

hañs hañs ke zaḳhm khaa.e jo ham ne shabāb meñ

ye tāzgī ye rañg bhī aayā kahāñ se hai

kāñToñ kā ḳhuun hī to hai shāyad gulāb meñ

puure kahāñ hue mire armāñ gunāh ke

kyā ḳhaak dil lagegā abhī se savāb meñ

bedāriyoñ kī taab na ham lā sake 'habīb'

guzrī hayāt ek musalsal se ḳhvāb meñ

nazren jhuki sawal pe mere jawab mein

kya kya na kah gai hai nigahen hijab mein

mizrab hi se saz mein hai sari naghmagi

hai zindagi ka lutf nihan iztirab mein

rah-e-wafa mein us ke qadam Dagmagaen kyon

dekha hai jis ne tera karam bhi itab mein

sadqe nigah-e-naz ke hun be-niyaz-e-jam

aae ye kaif-e-husn kahan se sharab mein

main rah-naward-e-shauq hun mujh ko kahan ye hosh

rahat mein guzre dil ki ye guzre azab mein

rah rah ke ab rulati hai piri mein un ki yaad

hans hans ke zaKHm khae jo hum ne shabab mein

ye tazgi ye rang bhi aaya kahan se hai

kanTon ka KHun hi to hai shayad gulab mein

pure kahan hue mere arman gunah ke

kya KHak dil lagega abhi se sawab mein

bedariyon ki tab na hum la sake 'habib'

guzri hayat ek musalsal se KHwab mein