nazron mein samaya hai ek jalwa-e-jaanana

nazroñ meñ samāyā hai ik jalva-e-jānāna

ab donoñ barābar haiñ ka.aba ho ki but-ḳhāna

andāz-e-junūñ merā aisā hai hakīmāna

farzānoñ meñ farzāna dīvānoñ meñ dīvāna

vaa.iz ne nahīñ kholā ik rāz-e-haqīqat bhī

bas bāteñ hī bāteñ haiñ afsāna hī afsāna

ye sūrat-e-nāz achchhī ye rasm-e-niyāz achchhī

husn apnoñ se begāna ishq aap se begāna

vo rind-e-azal huuñ maiñ saaqī kī nigāhoñ meñ

sad jān-e-adab merī ik laġhzish-e-mastāna

rahtī hai mudām ulTī rindān-e-qadah-kash se

aflāk kī gardish ho yā gardish-e-paimāna

vaa.iz ko shikāyat kyoñ vaa.iz kī shikāyat kyā

maiñ hosh se begāna ye aql se begāna

hangāma havas kā ho yā ishq ko shorish ho

ik dil hī pe mabnī hai kaunain kā afsāna

ye soz mire dil kā kab us ko mayassar thā

jaltī huī kyā rahtī ḳhākistar-e-parvāna

thā hosh ke dam tak hī har shikva-e-be-mehrī

ab tum se kahegā kyā dil aap se begāna

paḌtī hai nazar mujh par ab shaiḳh-e-haram kī bhī

tujh se vo irādat hai ai murshid-e-mai-ḳhāna

pindār-shikan mastī saaqī se milī varna

mai-ḳhāna hilā detī ik jur.at-e-rindāna

is rāh-e-mohabbat meñ kuchh pesh nahīñ chaltī

'shākir' vo kahāñ apnī ab himmat-e-mardāna

nazron mein samaya hai ek jalwa-e-jaanana

ab donon barabar hain kaba ho ki but-KHana

andaz-e-junun mera aisa hai hakimana

farzanon mein farzana diwanon mein diwana

waiz ne nahin khola ek raaz-e-haqiqat bhi

bas baaten hi baaten hain afsana hi afsana

ye surat-e-naz achchhi ye rasm-e-niyaz achchhi

husn apnon se begana ishq aap se begana

wo rind-e-azal hun main saqi ki nigahon mein

sad jaan-e-adab meri ek laghzish-e-mastana

rahti hai mudam ulTi rindan-e-qadah-kash se

aflak ki gardish ho ya gardish-e-paimana

waiz ko shikayat kyon waiz ki shikayat kya

main hosh se begana ye aql se begana

hangama hawas ka ho ya ishq ko shorish ho

ek dil hi pe mabni hai kaunain ka afsana

ye soz mere dil ka kab us ko mayassar tha

jalti hui kya rahti KHakistar-e-parwana

tha hosh ke dam tak hi har shikwa-e-be-mehri

ab tum se kahega kya dil aap se begana

paDti hai nazar mujh par ab shaiKH-e-haram ki bhi

tujh se wo iradat hai ai murshid-e-mai-KHana

pindar-shikan masti saqi se mili warna

mai-KHana hila deti ek jurat-e-rindana

is rah-e-mohabbat mein kuchh pesh nahin chalti

'shakir' wo kahan apni ab himmat-e-mardana