ne jam raha na to mai-KHana na hi shor kahin paimanon ka

ne jaam rahā na to mai-ḳhāna na hī shor kahīñ paimānoñ kā

saaqī kā kahīñ par naam rahā aur naam kahīñ mastānoñ kā

ai sham.a ise kyā samjheñ ham hañstī bhī hai tū rotī bhī hai tū

hai bā.is-e-ġham yā vaj.h-e-ḳhushī jal mar miTnā parvānoñ kā

hamdard jinheñ dil samjhā thā mat pūchhiye un se kyā paayā

dukh-dard kā maskan dil hai banā maḳhzan thā kabhī armānoñ kā

haq baat burī lagtī ho jahāñ har aib hunar ban jaa.e jahāñ

aise meñ mile insāf kahāñ kyā kaam yahāñ mīzānoñ kā

kyā dost agar hoñ dushman bhī aa jaa.eñ tire dar par jo kabhī

āñkheñ tū bichhā.e jā 'najmī' dil rakh lenā mehmānoñ kā

ne jam raha na to mai-KHana na hi shor kahin paimanon ka

saqi ka kahin par nam raha aur nam kahin mastanon ka

ai shama ise kya samjhen hum hansti bhi hai tu roti bhi hai tu

hai bais-e-gham ya wajh-e-KHushi jal mar miTna parwanon ka

hamdard jinhen dil samjha tha mat puchhiye un se kya paya

dukh-dard ka maskan dil hai bana maKHzan tha kabhi armanon ka

haq baat buri lagti ho jahan har aib hunar ban jae jahan

aise mein mile insaf kahan kya kaam yahan mizanon ka

kya dost agar hon dushman bhi aa jaen tere dar par jo kabhi

aankhen tu bichhae ja 'najmi' dil rakh lena mehmanon ka