neamat-e-tark-e-talab tark-e-tamanna mange

ne.amat-e-tark-e-talab tark-e-tamannā māñge

dene vaale se jo māñge bhī to kyā māñge

zarf-e-dil soz-e-darūñ dīda-e-bīnā māñge

ye jo mil jaa.eñ to phir dāvat-e-jalva māñge

haram-o-dair-o-kalīsā meñ jhukegī kyūñ-kar

vo jabīñ jo ki tirā naqsh-e-kaf-e-pā māñge

ham to iqrār-e-gunah hashr meñ kar bhī leñge

shān-e-rahmat ye nahīñ hai ki ishāra māñge

dast-o-bāzū kī karāmat se milā kartī hai

chiiz kyuuñ koī kisī se bhī ḳhudārā māñge

hashr meñ yuuñ bhī mulāqāt to ho jā.egī

kyuuñ abas tujh se koī vāda-e-fardā māñge

neamat-e-tark-e-talab tark-e-tamanna mange

dene wale se jo mange bhi to kya mange

zarf-e-dil soz-e-darun dida-e-bina mange

ye jo mil jaen to phir dawat-e-jalwa mange

haram-o-dair-o-kalisa mein jhukegi kyun-kar

wo jabin jo ki tera naqsh-e-kaf-e-pa mange

hum to iqrar-e-gunah hashr mein kar bhi lenge

shan-e-rahmat ye nahin hai ki ishaara mange

dast-o-bazu ki karamat se mila karti hai

chiz kyun koi kisi se bhi KHudara mange

hashr mein yun bhi mulaqat to ho jaegi

kyun abas tujh se koi wada-e-farda mange