nibhaya ishq ne rishta jo pyas pani ka

nibhāyā ishq ne rishta jo pyaas paanī kā

uḌā ke le gayā hosh-o-havās paanī kā

kaTe shajar ke sisakte hue se pattoñ par

dikhā.ī detā hai chehra udaas paanī kā

sharīf logoñ kī āñkhoñ meñ aag rakh degī

pahan ke niklegī jab vo libās paanī kā

vo aise dekhtā rahtā hai merī āñkhoñ meñ

lagāne baiThā huuñ jaise qayās paanī kā

kināre ho ke khaḌe shor sun rahe ho kyā

utar ke dekho tahoñ meñ hirās paanī kā

tumheñ sañvarne kī sajne kī kyā zarūrat hai

chamaktā rahtā hai ruḳh par ujaas paanī kā

lipaT ga.e haiñ mire paañv se sabhī aflāk

jo mere haath meñ aayā gilās paanī kā

isī liye to mirā sar buland rahtā hai

hamesha azm rahā mere paas paanī kā

'nadīm' ghuum ke saare jahāñ meñ dekh liyā

koī bachā hī nahīñ ab shanās paanī kā

nibhaya ishq ne rishta jo pyas pani ka

uDa ke le gaya hosh-o-hawas pani ka

kaTe shajar ke sisakte hue se patton par

dikhai deta hai chehra udas pani ka

sharif logon ki aankhon mein aag rakh degi

pahan ke niklegi jab wo libas pani ka

wo aise dekhta rahta hai meri aankhon mein

lagane baiTha hun jaise qayas pani ka

kinare ho ke khaDe shor sun rahe ho kya

utar ke dekho tahon mein hiras pani ka

tumhein sanwarne ki sajne ki kya zarurat hai

chamakta rahta hai ruKH par ujas pani ka

lipaT gae hain mere panw se sabhi aflak

jo mere hath mein aaya gilas pani ka

isi liye to mera sar buland rahta hai

hamesha azm raha mere pas pani ka

'nadim' ghum ke sare jahan mein dekh liya

koi bacha hi nahin ab shanas pani ka