nigah-e-awwalin ki dilistani yaad aati hai

nigāh-e-avvalīñ kī dilistānī yaad aatī hai

kisī nā-mehrbāñ kī mehrbānī yaad aatī hai

qarīb-e-shāḳh-e-gul hotī hai jab dastāñ-sarā bulbul

hameñ bhī bhūlī-bisrī ik kahānī yaad aatī hai

dil-e-nāshādmāñ ko aur bhī nāshād karne ko

dil-e-nāshādmāñ kī shādmānī yaad aatī hai

javānī aur bū-e-gul meñ yā rab kyā ta.alluq thā

ki bū-e-gul se piirī meñ javānī yaad aatī hai

ġhazal ab ḳhatm ho jaatī hai apnī pāñch sheroñ par

javānī aur tabī.at kī ravānī yaad aatī hai

nigah-e-awwalin ki dilistani yaad aati hai

kisi na-mehrban ki mehrbani yaad aati hai

qarib-e-shaKH-e-gul hoti hai jab dastan-sara bulbul

hamein bhi bhuli-bisri ek kahani yaad aati hai

dil-e-nashadman ko aur bhi nashad karne ko

dil-e-nashadman ki shadmani yaad aati hai

jawani aur bu-e-gul mein ya rab kya talluq tha

ki bu-e-gul se piri mein jawani yaad aati hai

ghazal ab KHatm ho jati hai apni panch sheron par

jawani aur tabiat ki rawani yaad aati hai