nigah-e-shauq ko jab tera naqsh-e-pa na mila

nigāh-e-shauq ko jab terā naqsh-e-pā na milā

mujhe bhī husn-e-haqīqat kā aa.ina na milā

jise bhī dekho vahī ajnabī sā lagtā hai

tumhāre shahr meñ koī bhī āshnā na milā

hudūd-e-dair-o-kalīsā meñ ḳhānqāhoñ meñ

bahut talāsh kiyā ham ko pārsā na milā

taḌapte rah ga.e din meñ bhī raushnī ke liye

charāġh bechne vāloñ ko mash.lā na milā

hamāre dars pe ġhairoñ ne pā liyā sāhil

hamāre apne safīne ko nāḳhudā na milā

sukūñ milegā unheñ kis ke āstāne par

vo ahl-e-dard jinheñ terā aasrā na milā

matā-e-dil vo mirī lūTne chalā thā magar

ye aur baat ki rahzan ko hausla na milā

mirī vafāoñ pe ilzām to bahut aa.e

mirī vafāoñ kā mujh ko magar sila na milā

vafā ke tazkire ham ne bahut sune 'ḳhālid'

magar jahāñ meñ koī ham ko bā-vafā na milā

nigah-e-shauq ko jab tera naqsh-e-pa na mila

mujhe bhi husn-e-haqiqat ka aaina na mila

jise bhi dekho wahi ajnabi sa lagta hai

tumhaare shahr mein koi bhi aashna na mila

hudud-e-dair-o-kalisa mein KHanqahon mein

bahut talash kiya hum ko parsa na mila

taDapte rah gae din mein bhi raushni ke liye

charagh bechne walon ko mashla na mila

hamare dars pe ghairon ne pa liya sahil

hamare apne safine ko naKHuda na mila

sukun milega unhen kis ke aastane par

wo ahl-e-dard jinhen tera aasra na mila

mata-e-dil wo meri luTne chala tha magar

ye aur baat ki rahzan ko hausla na mila

meri wafaon pe ilzam to bahut aae

meri wafaon ka mujh ko magar sila na mila

wafa ke tazkire hum ne bahut sune 'KHalid'

magar jahan mein koi hum ko ba-wafa na mila