nigah-e-shauq tujhe kaamyab kis ne kiya

nigāh-e-shauq tujhe kāmyāb kis ne kiyā

dil-e-tabāh ko ḳhāna-ḳharāb kis ne kiyā

kitāb ġham kī ka.ī log likh rahe the magar

hamāre naam use intisāb kis ne kiyā

ḳhamosh dard ko iz.hār kī zabāñ de kar

ḳhud apne aap ko yuuñ be-naqāb kis ne kiyā

umiid thī to muhāfiz shikasta kashtī kī

ye kyā batā.eñ ise zer-e-āb kis ne kiyā

ijāra-dārī-e-qalb-o-nazar kā jhagḌā thā

dil-o-nazar meñ ye paidā hijāb kis ne kiyā

sahārā aap kī jānib se kuchh na kuchh to milā

maiñ ik duā thā mujhe mustajāb kis ne kiyā

ye bahs ḳhatm hī ho jaa.e ab to achchhā hai

javāb kis ko milā lā-javāb kis ne kiyā

vo shahr jis se shikāyat hai ab nayā to nahīñ

ye kis ko zid thī use intiḳhāb kis ne kiyā

nigah-e-shauq tujhe kaamyab kis ne kiya

dil-e-tabah ko KHana-KHarab kis ne kiya

kitab gham ki kai log likh rahe the magar

hamare nam use intisab kis ne kiya

KHamosh dard ko izhaar ki zaban de kar

KHud apne aap ko yun be-naqab kis ne kiya

umid thi to muhafiz shikasta kashti ki

ye kya bataen ise zer-e-ab kis ne kiya

ijara-dari-e-qalb-o-nazar ka jhagDa tha

dil-o-nazar mein ye paida hijab kis ne kiya

sahaara aap ki jaanib se kuchh na kuchh to mila

main ek dua tha mujhe mustajab kis ne kiya

ye bahs KHatm hi ho jae ab to achchha hai

jawab kis ko mila la-jawab kis ne kiya

wo shahr jis se shikayat hai ab naya to nahin

ye kis ko zid thi use intiKHab kis ne kiya