nigah-e-shoKH jab us se laDi hai

nigāh-e-shoḳh jab us se laḌī hai

to bijlī thartharā kar gir paḌī hai

use bhī mujh ko bhī zid aa paḌī hai

ḳharābī biich vāloñ kī baḌī hai

qayāmat meñ qayāmat kar gayā kaun

ki dil thāme saf-e-mehshar khaḌī hai

kareñ kyā rind tauba mai se zāhid

ki ye to un kī ghuTTī meñ paḌī hai

qadam jamtā nahīñ terī galī meñ

kisī betāb kī mayyat gaḌī hai

adū bhī tañg hai un ke sitam se

use apnī mujhe apnī paḌī hai

abhī maiñ ne kiyā thā yaad us ko

vo aayā umr qāsid kī baḌī hai

banā hai mudda.ī paiġhām-bar bhī

jaḌī hai jab mirī khūTī jaḌī hai

kiyā hai maiñ ne zabt-e-āh jis dam

anī barchhī kī siine meñ gaḌī hai

gul-e-bistar sitāre ban ga.e haiñ

tire māthe se jab afshāñ jhaḌī hai

ye kahtā hai mirā shauq-e-shahādat

tirī talvār phūloñ kī chhaḌī hai

vo rūTheñ ġhair se to ham manā.eñ

parā.ī aafat apne sar paḌī hai

tujhe detā huuñ apnī jaan bhī maiñ

mire dil se mirī himmat baḌī hai

Taleñ vo kab jo dil lene pe aḌ jaa.eñ

ye kyā kuchh khel chausar kī aḌī hai

ilāhī kab sahar hogī shab-e-hijr

qayāmat kī ghaḌī hai jo ghaḌī hai

bigaḌ kar ham ne sau ilzām paa.e

ab un kī har tarah se ban paḌī hai

ġhazal ik aur bhī ai 'dāġh' likkho

tabī.at is zamīñ meñ kuchh laḌī hai

nigah-e-shoKH jab us se laDi hai

to bijli tharthara kar gir paDi hai

use bhi mujh ko bhi zid aa paDi hai

KHarabi bich walon ki baDi hai

qayamat mein qayamat kar gaya kaun

ki dil thame saf-e-mehshar khaDi hai

karen kya rind tauba mai se zahid

ki ye to un ki ghuTTi mein paDi hai

qadam jamta nahin teri gali mein

kisi betab ki mayyat gaDi hai

adu bhi tang hai un ke sitam se

use apni mujhe apni paDi hai

abhi main ne kiya tha yaad us ko

wo aaya umr qasid ki baDi hai

bana hai muddai paigham-bar bhi

jaDi hai jab meri khuTi jaDi hai

kiya hai main ne zabt-e-ah jis dam

ani barchhi ki sine mein gaDi hai

gul-e-bistar sitare ban gae hain

tere mathe se jab afshan jhaDi hai

ye kahta hai mera shauq-e-shahadat

teri talwar phulon ki chhaDi hai

wo ruThen ghair se to hum manaen

parai aafat apne sar paDi hai

tujhe deta hun apni jaan bhi main

mere dil se meri himmat baDi hai

Talen wo kab jo dil lene pe aD jaen

ye kya kuchh khel chausar ki aDi hai

ilahi kab sahar hogi shab-e-hijr

qayamat ki ghaDi hai jo ghaDi hai

bigaD kar hum ne sau ilzam pae

ab un ki har tarah se ban paDi hai

ghazal ek aur bhi ai 'dagh' likkho

tabiat is zamin mein kuchh laDi hai