nigahen nichi rakhte hain bulandi ke nishan wale

nigāheñ nīchī rakhte haiñ bulandī ke nishāñ vaale

uThā kar sar nahīñ chalte zamīñ par āsmāñ vaale

taqayyud habs kā āzādiyāñ dil kī nahīñ khotā

qafas ko bhī banā lete haiñ gulshan āshiyāñ vaale

nahīñ hai rahbarī-e-manzil-e-irfān-e-dil āsāñ

bhaTak jaate haiñ aksar rāste se kārvāñ vaale

zamīñ kī inkisārī bhī baḌā e'jāz rakhtī hai

jabīñ-sā ho ga.e ḳhushkī pe bahr-e-be-karāñ vaale

kisī din garm bāzār-e-aqīdat ho to jaane do

lagā.eñge mire sajdoñ kī qīmat āsmāñ vaale

ajal kahte haiñ jis ko naam hai kamzor hī dil kā

use ḳhātir meñ kyuuñ laa.eñ hayāt-e-jāvidāñ vaale

hameñ 'turfa' kī lai se kyuuñ na ho irfān-e-dil hāsil

subuk naġhme sunāte hī nahīñ sāz-e-garāñ vaale

nigahen nichi rakhte hain bulandi ke nishan wale

uTha kar sar nahin chalte zamin par aasman wale

taqayyud habs ka aazadiyan dil ki nahin khota

qafas ko bhi bana lete hain gulshan aashiyan wale

nahin hai rahbari-e-manzil-e-irfan-e-dil aasan

bhaTak jate hain aksar raste se karwan wale

zamin ki inkisari bhi baDa e'jaz rakhti hai

jabin-sa ho gae KHushki pe bahr-e-be-karan wale

kisi din garm bazar-e-aqidat ho to jaane do

lagaenge mere sajdon ki qimat aasman wale

ajal kahte hain jis ko nam hai kamzor hi dil ka

use KHatir mein kyun laen hayat-e-jawidan wale

hamein 'turfa' ki lai se kyun na ho irfan-e-dil hasil

subuk naghme sunate hi nahin saz-e-garan wale