nigahen uTh rahi hain meri jaanib ek zamane ki

nigāheñ uTh rahī haiñ merī jānib ik zamāne kī

bharam khul jā.egā koshish na kiije muskurāne kī

zamāne ke sitam un kī jafā mirī fidā-kārī

yahī shāyad baneñgī surḳhiyāñ mere fasāne kī

jahāñ se bijliyoñ kā qāfila guzrā hai gulshan meñ

vahīñ buniyād rakh chhoḌī hai maiñ ne āshiyāne kī

ḳhizāñ ke ruḳh pe zahrīlā tabassum maiñ ne dekhā hai

kalī ko mil ga.ī shāyad ijāzat muskurāne kī

mashiyyat kā ye manshā hai maiñ tūfānoñ meñ ubharūñgā

zamāna laakh kar le sāzisheñ mere miTāne kī

nasīhat karne vaalo shukriya lekin ye batlāo

kahāñ se lā.ūñ himmat un ke dar se lauT aane kī

kabhī majbūri-e-hālāt meñ aisā bhī hotā hai

safīnoñ ko huā kartī hai ḳhvāhish Duub jaane kī

añdheroñ ne 'qamar' kyā kyā mirī rāhoñ ko rokā hai

kabhī koshish jo maiñ ne kī koī sham.a jalāne ke

nigahen uTh rahi hain meri jaanib ek zamane ki

bharam khul jaega koshish na kije muskurane ki

zamane ke sitam un ki jafa meri fida-kari

yahi shayad banengi surKHiyan mere fasane ki

jahan se bijliyon ka qafila guzra hai gulshan mein

wahin buniyaad rakh chhoDi hai main ne aashiyane ki

KHizan ke ruKH pe zahrila tabassum main ne dekha hai

kali ko mil gai shayad ijazat muskurane ki

mashiyyat ka ye mansha hai main tufanon mein ubharunga

zamana lakh kar le sazishen mere miTane ki

nasihat karne walo shukriya lekin ye batlao

kahan se laun himmat un ke dar se lauT aane ki

kabhi majburi-e-haalat mein aisa bhi hota hai

safinon ko hua karti hai KHwahish Dub jaane ki

andheron ne 'qamar' kya kya meri rahon ko roka hai

kabhi koshish jo main ne ki koi shama jalane ke