nigah-e-shauq se husn-e-gul-o-gulzar to dekh

nigah-e-shauq se husn-e-gul-o-gulzār to dekh

āñkheñ khul jā.eñgī ye manzar-e-dīdār to dekh

paikar-e-shāhid-e-hastī meñ hai ik aañch na.ī

lazzat-e-dīd uThā shola-e-ruḳhsār to dekh

shoḳhī-e-naqsh koī hādsa-e-vaqt nahīñ

mo.ajaza-e-kārī-e-ḳhūn-e-dil-e-fankār to dekh

har dukāñ apnī jagah hairat-e-nazzāra hai

fikr-e-insāñ ke sajā.e hue bāzār to dekh

ban ga.e gard-e-safar qāfile āvāzoñ ke

ādam-e-nau kī zarā garmi-e-raftār to dekh

munqalib ho gayā paimāna-e-har-bast-o-buland

dekh kar apnī taraf jānib-e-kohsār to dekh

na.e āhañg se ab naġhma-sarā hai 'akbar'

fikr ke saath zarā shoḳhi-e-guftār to dekh

nigah-e-shauq se husn-e-gul-o-gulzar to dekh

aankhen khul jaengi ye manzar-e-didar to dekh

paikar-e-shahid-e-hasti mein hai ek aanch nai

lazzat-e-did uTha shola-e-ruKHsar to dekh

shoKHi-e-naqsh koi hadsa-e-waqt nahin

moajaza-e-kari-e-KHun-e-dil-e-fankar to dekh

har dukan apni jagah hairat-e-nazzara hai

fikr-e-insan ke sajae hue bazar to dekh

ban gae gard-e-safar qafile aawazon ke

aadam-e-nau ki zara garmi-e-raftar to dekh

munqalib ho gaya paimana-e-har-bast-o-buland

dekh kar apni taraf jaanib-e-kohsar to dekh

nae aahang se ab naghma-sara hai 'akbar'

fikr ke sath zara shoKHi-e-guftar to dekh