nigah rakh di zaban rakh di mataa-e-qalb-o-jaan rakh di

nigah rakh dī zabāñ rakh dī matā.a-e-qalb-o-jāñ rakh dī

miTā kar apnī hastī pesh-e-sang-e-āstāñ rakh dī

gumāñ guzrā tire naqsh-e-kaf-e-pā kā jahāñ rakh dī

nahīñ ye hosh ham ko ham ne peshānī kahāñ rakh dī

banāyā aur dil meñ joshish-e-ātish-fashāñ rakh dī

ġhazab kī ek musht-e-ḳhāk zer-e-āsmāñ rakh dī

vo ab apnā kaheñ yā ġhair zarf-e-ahl-e-gulshan hai

hameñ ye faḳhr kyā kam hai binā-e-gulsitāñ rakh dī

mire siine meñ yā-rab ye dil-e-betāb kyā kam thā

jo is meñ ek-tarfa ḳhvāhish-e-dīd-e-butāñ rakh dī

baḌā hī bol-bālā thā magar ham ahl-e-vahshat ne

uḌā kar ek hī Thokar meñ gard-e-āsmāñ rakh dī

huzūr-e-dost kab thī jur.at-e-arz-e-suḳhan dil ko

bayāñ kar ke nigāh-e-shauq ne sab dāstāñ rakh dī

tamāshā.ī banāne ke liye āñkheñ atā kī haiñ

sanā-ḳhvāñ ban ke rahne ke liye muñh meñ zabāñ rakh dī

zabāñ urdu bayāñ dil-jū aur andāz-e-ġhazal ḳhushbū

zamīn-e-sher meñ kaifiyyat-e-bāġh-e-jināñ rakh dī

mubārak ye ġhazal kah kar 'na.īm' apne liye tum ne

jahān-e-sher meñ buniyād-e-qasr-e-jāvedāñ rakh dī

nigah rakh di zaban rakh di mataa-e-qalb-o-jaan rakh di

miTa kar apni hasti pesh-e-sang-e-astan rakh di

guman guzra tere naqsh-e-kaf-e-pa ka jahan rakh di

nahin ye hosh hum ko hum ne peshani kahan rakh di

banaya aur dil mein joshish-e-atish-fashan rakh di

ghazab ki ek musht-e-KHak zer-e-asman rakh di

wo ab apna kahen ya ghair zarf-e-ahl-e-gulshan hai

hamein ye faKHr kya kam hai bina-e-gulsitan rakh di

mere sine mein ya-rab ye dil-e-betab kya kam tha

jo is mein ek-tarfa KHwahish-e-did-e-butan rakh di

baDa hi bol-baala tha magar hum ahl-e-wahshat ne

uDa kar ek hi Thokar mein gard-e-asman rakh di

huzur-e-dost kab thi jurat-e-arz-e-suKHan dil ko

bayan kar ke nigah-e-shauq ne sab dastan rakh di

tamashai banane ke liye aankhen ata ki hain

sana-KHwan ban ke rahne ke liye munh mein zaban rakh di

zaban urdu bayan dil-ju aur andaz-e-ghazal KHushbu

zamin-e-sher mein kaifiyyat-e-bagh-e-jinan rakh di

mubarak ye ghazal kah kar 'naim' apne liye tum ne

jahan-e-sher mein buniyaad-e-qasr-e-jawedan rakh di