nihan hai sab se pa har ja dikhai deta hai

nihāñ hai sab se pa har jā dikhā.ī detā hai

chahār-sū tirā jalva dikhā.ī detā hai

ye shaġhl dil kā purānā dikhā.ī detā hai

phir us galī kā irāda dikhā.ī detā hai

matā-e-dard-o-alam ke yahāñ dafīne haiñ

hamāre dil kā ḳharāba dikhā.ī detā hai

ummid-o-bīm kā vo ek isti.āra hai

jo dosh-e-mauj pe tinkā dikhā.ī detā hai

gila bahār ke jaane kā kyā ki rang-e-chaman

ḳhizāñ meñ aur nikhartā dikhā.ī detā hai

atā-e-dīda-e-bīnā bhī ik azaab huā

har ek shaḳhs barahna dikhā.ī detā hai

is anjuman meñ koī āshnā nahīñ lekin

har ek chehra shanāsā dikhā.ī detā hai

harīm-e-qalb meñ aatā hai jab ḳhayāl tirā

koī sahīfa utartā dikhā.ī detā hai

is ahd-e-tīra-ḳhirad se shikāyateñ kaisī

ise to kor bhī biinā dikhā.ī detā hai

ajiib baat hai is izhdihām-e-ḳhalq meñ bhī

jise bhī dekhiye tanhā dikhā.ī detā hai

vahīñ pe hotā hai aksar hujūm-e-tishna-labāñ

jahāñ pe abr barastā dikhā.ī detā hai

ye kaise sail-e-balā meñ ghirī hai kashtī-e-umr

bhañvar sā ruuh meñ paḌtā dikhā.ī detā hai

hazār karb se guzre koī kisī ko kyā

tamāsh-bīñ ko tamāsha dikhā.ī detā hai

gila kareñ bhī to kyā apnī kam-nigāhī kā

nazar na aa.e to kyā kyā dikhā.ī detā hai

ajiib nashsha hai sahbā-e-zindagī meñ 'urūj'

jise bhī dekheñ bahaktā dikhā.ī detā hai

nihan hai sab se pa har ja dikhai deta hai

chahaar-su tera jalwa dikhai deta hai

ye shaghl dil ka purana dikhai deta hai

phir us gali ka irada dikhai deta hai

mata-e-dard-o-alam ke yahan dafine hain

hamare dil ka KHaraba dikhai deta hai

ummid-o-bim ka wo ek istiara hai

jo dosh-e-mauj pe tinka dikhai deta hai

gila bahaar ke jaane ka kya ki rang-e-chaman

KHizan mein aur nikharta dikhai deta hai

ata-e-dida-e-bina bhi ek azab hua

har ek shaKHs barahna dikhai deta hai

is anjuman mein koi aashna nahin lekin

har ek chehra shanasa dikhai deta hai

harim-e-qalb mein aata hai jab KHayal tera

koi sahifa utarta dikhai deta hai

is ahd-e-tira-KHirad se shikayaten kaisi

ise to kor bhi bina dikhai deta hai

ajib baat hai is izhdiham-e-KHalq mein bhi

jise bhi dekhiye tanha dikhai deta hai

wahin pe hota hai aksar hujum-e-tishna-laban

jahan pe abr barasta dikhai deta hai

ye kaise sail-e-bala mein ghiri hai kashti-e-umr

bhanwar sa ruh mein paDta dikhai deta hai

hazar karb se guzre koi kisi ko kya

tamash-bin ko tamasha dikhai deta hai

gila karen bhi to kya apni kam-nigahi ka

nazar na aae to kya kya dikhai deta hai

ajib nashsha hai sahba-e-zindagi mein 'uruj'

jise bhi dekhen bahakta dikhai deta hai