nindon ka bojh palkon pe Dhona paDa mujhe

nīñdoñ kā bojh palkoñ pe Dhonā paḌā mujhe

āñkhoñ ke iltimās pe sonā paḌā mujhe

tā-umr apne kāñdhoñ pe be-gor be-kafan

apnī anā kī laash ko Dhonā paḌā mujhe

kam-zarf nā-ḳhudāoñ ke ehsāñ se bach gayā

hālāñ ki kashtiyoñ ko Dubonā paḌā mujhe

vo merī bebasī pe kuchh itnā hañsā 'navāz'

hañsne ke ehtirām meñ ronā paḌā mujhe

nindon ka bojh palkon pe Dhona paDa mujhe

aankhon ke iltimas pe sona paDa mujhe

ta-umr apne kandhon pe be-gor be-kafan

apni ana ki lash ko Dhona paDa mujhe

kam-zarf na-KHudaon ke ehsan se bach gaya

haalan ki kashtiyon ko Dubona paDa mujhe

wo meri bebasi pe kuchh itna hansa 'nawaz'

hansne ke ehtiram mein rona paDa mujhe