nikal paDa hai wo suraj nai tapan le kar

nikal paḌā hai vo sūraj na.ī tapan le kar

chalā hai le ke vo barchhī ki phir kiran le kar

jo mere hissa kā bādal hai kyoñ nahīñ barsā

kahāñ maiñ jā.ūñ bhalā tan kī ye agan le kar

har ek shaḳhs gayā chhoḌ kar mujhe aage

kahīñ maiñ mar hī na jā.ūñ yahī jalan le kar

faqīr ham haiñ ki jholā uThā ke chal deñge

kahāñ kahāñ liye phirte raheñge dhan le kar

zamīñ pe chāñd sitāre utaar lā.eñge

chale haiñ dil meñ ham apne yahī lagan le kar

birah kī maarī maiñ birhan kahāñ se sukh bhogūñ

churā ke merī ḳhushī sab gayā sajan le kar

gulāb hoñToñ meñ zulfoñ meñ yaas meñ un ke

vo ghar se nikle haiñ ḳhushbū-bharā badan le kar

dayār-e-yār meñ ham chhoḌ aa.e dil 'sābir'

ki lauT aa.e haiñ apnā niDhāl tan le kar

nikal paDa hai wo suraj nai tapan le kar

chala hai le ke wo barchhi ki phir kiran le kar

jo mere hissa ka baadal hai kyon nahin barsa

kahan main jaun bhala tan ki ye agan le kar

har ek shaKHs gaya chhoD kar mujhe aage

kahin main mar hi na jaun yahi jalan le kar

faqir hum hain ki jhola uTha ke chal denge

kahan kahan liye phirte rahenge dhan le kar

zamin pe chand sitare utar laenge

chale hain dil mein hum apne yahi lagan le kar

birah ki mari main birhan kahan se sukh bhogun

chura ke meri KHushi sab gaya sajan le kar

gulab honTon mein zulfon mein yas mein un ke

wo ghar se nikle hain KHushbu-bhara badan le kar

dayar-e-yar mein hum chhoD aae dil 'sabir'

ki lauT aae hain apna niDhaal tan le kar