nikla hai zulm toD ke sare hisar bhag

niklā hai zulm toḌ ke saare hisār bhaag

suntā hai kaun ab na kisī ko pukār bhaag

maiñ gardishoñ se bhāgtā phirtā huuñ raat din

tū bhī zamīn chhoḌ ke apnā madār bhaag

go qāfila chalā gayā tū ġham-zada na ho

vo dekh uTh rahā hai abhī bhī ġhubār bhaag

lipTī hai tere jism se kyoñ dopahar kī shaal

kyoñ ho rahā hai din kī havas kā shikār bhaag

bhūlā dayār-e-ġhair meñ aayā hai to tujhe

uljhā na de ye gardish-e-lail-o-nahār bhaag

ik tū bachā hai shahr to saarā ujaḌ gayā

ab kar rahā hai kis kā bhalā intizār bhaag

ik pal meñ hī sameT le sadiyoñ kā fāsla

paañv se 'qais' vaqt kī beḌī utaar bhaag

nikla hai zulm toD ke sare hisar bhag

sunta hai kaun ab na kisi ko pukar bhag

main gardishon se bhagta phirta hun raat din

tu bhi zamin chhoD ke apna madar bhag

go qafila chala gaya tu gham-zada na ho

wo dekh uTh raha hai abhi bhi ghubar bhag

lipTi hai tere jism se kyon dopahar ki shaal

kyon ho raha hai din ki hawas ka shikar bhag

bhula dayar-e-ghair mein aaya hai to tujhe

uljha na de ye gardish-e-lail-o-nahaar bhag

ek tu bacha hai shahr to sara ujaD gaya

ab kar raha hai kis ka bhala intizar bhag

ek pal mein hi sameT le sadiyon ka fasla

panw se 'qais' waqt ki beDi utar bhag