nikle ho kis bahaar se tum zard-posh ho

nikle ho kis bahār se tum zard-posh ho

jis kī naved pahuñchī hai rañg-e-basant ko

dī bar meñ ab libās-e-basantī ko jaise jā

aise hī tum hamāre bhī siina se aa lago

gar ham nashe meñ bosa kaheñ do to lutf se

tum paas muñh ko lā ke ye hañs kar kaho ki lo

baiTho chaman meñ nargis o sad-barg kī taraf

nazzāra kar ke aish-o-masarrat kī daad do

sun kar basant mutrib-e-zarrīn-libās se

bhar bhar ke jaam phir mai-e-gul-rañg ke piyo

kuchh qumriyoñ ke naġhma ko do sāme.a meñ raah

kuchh bulbuloñ kā zamzama-e-dil-kushā suno

matlab hai ye 'nazīr' kā yuuñ dekh kar basant

ho tum bhī shaad dil ko hamāre bhī ḳhush karo

nikle ho kis bahaar se tum zard-posh ho

jis ki nawed pahunchi hai rang-e-basant ko

di bar mein ab libas-e-basanti ko jaise ja

aise hi tum hamare bhi sina se aa lago

gar hum nashe mein bosa kahen do to lutf se

tum pas munh ko la ke ye hans kar kaho ki lo

baiTho chaman mein nargis o sad-barg ki taraf

nazzara kar ke aish-o-masarrat ki dad do

sun kar basant mutrib-e-zarrin-libas se

bhar bhar ke jam phir mai-e-gul-rang ke piyo

kuchh qumriyon ke naghma ko do samea mein rah

kuchh bulbulon ka zamzama-e-dil-kusha suno

matlab hai ye 'nazir' ka yun dekh kar basant

ho tum bhi shad dil ko hamare bhi KHush karo