nit-nai KHush-fahmiyon mein mubtala rakhta hun main

nit-na.ī ḳhush-fahmiyoñ meñ mubtalā rakhtā huuñ maiñ

ḳhalq ke hāthoñ ko masrūf-e-duā rakhtā huuñ maiñ

ḳhushk dhartī ko atā kartā huuñ saaya abr kā

qatra-e-bārāñ pe dariyā kī binā rakhtā huuñ maiñ

DhūñDh hī letī hai mujh ko DhūñDne vaalī nazar

apne saa.e ko agarche lāpatā rakhtā huuñ maiñ

kyuuñ bhalā āsūdgī mere muqaddar meñ nahīñ

kis liye din-rāt ḳhud ko jāgtā rakhtā huuñ maiñ

phūñktā rahtā huuñ bahr-e-lafz meñ 'ḳhālid' fusūñ

mauj-e-ma.anī ko talātum-āshnā rakhtā huuñ maiñ

nit-nai KHush-fahmiyon mein mubtala rakhta hun main

KHalq ke hathon ko masruf-e-dua rakhta hun main

KHushk dharti ko ata karta hun saya abr ka

qatra-e-baran pe dariya ki bina rakhta hun main

DhunDh hi leti hai mujh ko DhunDne wali nazar

apne sae ko agarche lapata rakhta hun main

kyun bhala aasudgi mere muqaddar mein nahin

kis liye din-raat KHud ko jagta rakhta hun main

phunkta rahta hun bahr-e-lafz mein 'KHalid' fusun

mauj-e-mani ko talatum-ashna rakhta hun main