nizam-e-shams-o-qamar kitne dast-e-KHak mein hain

nizām-e-shams-o-qamar kitne dast-e-ḳhāk meñ haiñ

zamāne jaise tirī chashm-ḳhvāb-nāk meñ haiñ

sharāb-o-sher meñ uryāñ to ho ga.e lekin

fazā-e-zāt ke parde har ek chaak meñ haiñ

shagufta-e-lāla-o-gul meñ bhī sab kahāñ nikhre

na jaane kitne shahīdoñ ke ḳhvāb ḳhaak meñ haiñ

tirā visāl zamistāñ kī raat ho jaise

vo sard-mehrī ke pahlū tire tapāk meñ haiñ

jo sar uThā ke chaleñ tum hī ik nahīñ ho 'arīb'

kuchh aise log abhī tak to hind-o-pāk meñ haiñ

nizam-e-shams-o-qamar kitne dast-e-KHak mein hain

zamane jaise teri chashm-KHwab-nak mein hain

sharab-o-sher mein uryan to ho gae lekin

faza-e-zat ke parde har ek chaak mein hain

shagufta-e-lala-o-gul mein bhi sab kahan nikhre

na jaane kitne shahidon ke KHwab KHak mein hain

tera visal zamistan ki raat ho jaise

wo sard-mehri ke pahlu tere tapak mein hain

jo sar uTha ke chalen tum hi ek nahin ho 'arib'

kuchh aise log abhi tak to hind-o-pak mein hain