nukta-chini hai aur aarastan-e-daman hai

nukta-chīnī hai aur ārāstan-e-dāman hai

jāma-e-yār meñ anqā shikan-e-dāman hai

dāman-e-gul se bhī halkā vazan-e-dāman hai

is pe bhī baar use ek ek shikan-e-dāman hai

kisī bekas ke lahū ke haiñ ye chhīñTe qātil

gul-e-hasrat se jo phūlā chaman-e-dāman hai

us kā ye kahnā ki bas bas mirā dāman chhoḌo

naqsh siine pe vo dilkash suḳhan-e-dāman hai

tum ne pūchhā gul-e-ruḳhsār hai kyā dāman se

aaj kuchh aur bahār-e-chaman-e-dāman hai

garmī-e-husn sharar-rez hai muñh is se na Dhāñk

mujh ko ai jaañ ḳhatar-e-soḳhtan-e-dāman hai

muñh pe hai us ke jo dāmān-e-qabā-e-shabnam

ban gayā ā.īna-e-sāf tan-e-dāman hai

chakh chalo sab se un āñkhoñ kī qasam ai 'tanvīr'

ain taslīm-e-sar-andāḳhtan-e-dāman hai

nukta-chini hai aur aarastan-e-daman hai

jama-e-yar mein anqa shikan-e-daman hai

daman-e-gul se bhi halka wazan-e-daman hai

is pe bhi bar use ek ek shikan-e-daman hai

kisi bekas ke lahu ke hain ye chhinTe qatil

gul-e-hasrat se jo phula chaman-e-daman hai

us ka ye kahna ki bas bas mera daman chhoDo

naqsh sine pe wo dilkash suKHan-e-daman hai

tum ne puchha gul-e-ruKHsar hai kya daman se

aaj kuchh aur bahaar-e-chaman-e-daman hai

garmi-e-husn sharar-rez hai munh is se na Dhank

mujh ko ai jaan KHatar-e-soKHtan-e-daman hai

munh pe hai us ke jo daman-e-qaba-e-shabnam

ban gaya aaina-e-saf tan-e-daman hai

chakh chalo sab se un aankhon ki qasam ai 'tanwir'

ain taslim-e-sar-andaKHtan-e-daman hai