numayan aur bhi ruKH teri be-ruKHi mein rahe

numāyāñ aur bhī ruḳh terī be-ruḳhī meñ rahe

supurdagī ke bhī pahlū kashīdgī meñ rahe

nazar uThī to uThā shor ik qayāmat kā

na jaane kaise ye hañgāme ḳhāmushī meñ rahe

havā-e-shahr-e-ġharībī kī kaifiyat thī ajiib

nashe meñ rah ke bhī ham apne aap hī meñ rahe

pukārte rahe kyā kyā na dil ke vīrāne

ham aise shahr meñ uljhe the shahr hī meñ rahe

hisār-e-vahshat-e-dil se nikal to aa.e magar

tamām-umr ajab sehr-e-āgahī meñ rahe

mirī vafā kī haqīqat ġhubār-e-dasht-e-talab

mirī vafā ke fasāne tirī galī meñ rahe

kabhī to pahuñchegī manzil pe sar-bulandī-e-shauq

is āsare pe maqāmāt-e-bandagī meñ rahe

unhīñ se ubhrī haiñ kitne ġhamoñ kī tasvīreñ

vo saa.e jo mirī āñkhoñ kī raushnī meñ rahe

hameñ milā thā sharaf kā.enāt par 'bāqar'

hameñ kalī kī tirā dil giraftagī meñ rahe

numayan aur bhi ruKH teri be-ruKHi mein rahe

supurdagi ke bhi pahlu kashidgi mein rahe

nazar uThi to uTha shor ek qayamat ka

na jaane kaise ye hangame KHamushi mein rahe

hawa-e-shahr-e-gharibi ki kaifiyat thi ajib

nashe mein rah ke bhi hum apne aap hi mein rahe

pukarte rahe kya kya na dil ke virane

hum aise shahr mein uljhe the shahr hi mein rahe

hisar-e-wahshat-e-dil se nikal to aae magar

tamam-umr ajab sehr-e-agahi mein rahe

meri wafa ki haqiqat ghubar-e-dasht-e-talab

meri wafa ke fasane teri gali mein rahe

kabhi to pahunchegi manzil pe sar-bulandi-e-shauq

is aasare pe maqamat-e-bandagi mein rahe

unhin se ubhri hain kitne ghamon ki taswiren

wo sae jo meri aankhon ki raushni mein rahe

hamein mila tha sharaf kaenat par 'baqar'

hamein kali ki tera dil giraftagi mein rahe