numud-e-subh ke imkan se zara pahle

numūd-e-sub.h ke imkān se zarā pahle

maiñ bujh gayā tire farmān se zarā pahle

ki pesh-ḳhema yaqīnan thā vo tabāhī kā

jo ik sukūt thā tūfān se zarā pahle

samajh sakeñ to chhaTī his hameñ samajhne kā

ishāra detī hai nuqsān se zarā pahle

bisāt apnī samajhnā hameñ zarūrī hai

kisī bhī ḳhvāhish-o-armān se zarā pahle

zamīr bech duuñ yā phir rakhūñ sar-e-bāzār

to pūchh lenā ye īmān se zarā pahle

mohabbatoñ meñ ġhamoñ kā lihāz ho kaise

samajh le 'mīr' ke dīvān se zarā pahle

tabāhī apnā muqaddar to thī 'vasīm' magar

ye hādisa huā imkān se zarā pahle

numud-e-subh ke imkan se zara pahle

main bujh gaya tere farman se zara pahle

ki pesh-KHema yaqinan tha wo tabahi ka

jo ek sukut tha tufan se zara pahle

samajh saken to chhaTi his hamein samajhne ka

ishaara deti hai nuqsan se zara pahle

bisat apni samajhna hamein zaruri hai

kisi bhi KHwahish-o-arman se zara pahle

zamir bech dun ya phir rakhun sar-e-bazar

to puchh lena ye iman se zara pahle

mohabbaton mein ghamon ka lihaz ho kaise

samajh le 'mir' ke diwan se zara pahle

tabahi apna muqaddar to thi 'wasim' magar

ye hadisa hua imkan se zara pahle