nusKHe mein tabibon ne likha aur hi kuchh hai

nusḳhe meñ tabīboñ ne likhā aur hī kuchh hai

bīmār-e-mohabbat kī davā aur hī kuchh hai

aġhyār se thiiñ mere satāne kī salāheñ

aur maiñ ne jo pūchhā to kahā aur hī kuchh hai

kahte haiñ vo ghabrā ke mujhe dekh ke ġhash meñ

mar jā.eñge ye in ko huā aur hī kuchh hai

māñge koī daulat koī izzat koī jannat

aur āshiq-e-be-dil kī duā aur hī kuchh hai

a.adā kī mulāqāt se inkār musallam

kyā kahiye magar ham ne sunā aur hī kuchh hai

har-chand qayāmat hai tirī chashm kī shoḳhī

shoḳhī meñ magar rañg-e-hayā aur hī kuchh hai

haañ zamzama-e-bulbul-o-qumrī na pe jaanā

'raunaq' dil-e-nādāñ kī sadā aur hī kuchh hai

nusKHe mein tabibon ne likha aur hi kuchh hai

bimar-e-mohabbat ki dawa aur hi kuchh hai

aghyar se thin mere satane ki salahen

aur main ne jo puchha to kaha aur hi kuchh hai

kahte hain wo ghabra ke mujhe dekh ke ghash mein

mar jaenge ye in ko hua aur hi kuchh hai

mange koi daulat koi izzat koi jannat

aur aashiq-e-be-dil ki dua aur hi kuchh hai

aada ki mulaqat se inkar musallam

kya kahiye magar hum ne suna aur hi kuchh hai

har-chand qayamat hai teri chashm ki shoKHi

shoKHi mein magar rang-e-haya aur hi kuchh hai

han zamzama-e-bulbul-o-qumri na pe jaana

'raunaq' dil-e-nadan ki sada aur hi kuchh hai