pabandi-e-izhaar ki lanat hi alag hai

pābandī-e-iz.hār kī la.anat hī alag hai

ḳhāmosh zabānoñ kī hikāyat hī alag hai

jo tum ne sitam Dhaa.e haiñ vo aur haiñ lekin

is dard-e-judā.ī kī aziyyat hī alag hai

tum ne to adāoñ se bahut qatl kiye haiñ

andāz-e-taġhāful kī qayāmat hī alag hai

hoñToñ se to hote haiñ adā harf-e-mohabbat

āñkhoñ ke ishāre kī vazāhat hī alag hai

tā-hadd-e-nazar diid ke qābil haiñ nazāre

lekin tire dīdār kī hasrat hī alag hai

ishrat-kada-e-dahr meñ kyā kyā nahīñ lekin

tere lab-o-ruḳhsār kī jannat hī alag hai

paḌhte haiñ baḌe shauq se arbāb-e-adab bhī

'ajmal' tire ash.ār kī nudrat hī alag hai

pabandi-e-izhaar ki lanat hi alag hai

KHamosh zabanon ki hikayat hi alag hai

jo tum ne sitam Dhae hain wo aur hain lekin

is dard-e-judai ki aziyyat hi alag hai

tum ne to adaon se bahut qatl kiye hain

andaz-e-taghaful ki qayamat hi alag hai

honTon se to hote hain ada harf-e-mohabbat

aankhon ke ishaare ki wazahat hi alag hai

ta-hadd-e-nazar did ke qabil hain nazare

lekin tere didar ki hasrat hi alag hai

ishrat-kada-e-dahr mein kya kya nahin lekin

tere lab-o-ruKHsar ki jannat hi alag hai

paDhte hain baDe shauq se arbab-e-adab bhi

'ajmal' tere ashaar ki nudrat hi alag hai