pamal-e-arzu dil-e-nakaam hi to hai

pāmāl-e-ārzū dil-e-nākām hī to hai

ḳhush huuñ ki ye bhī ishq kā anjām hī to hai

go zindagī kī shaam sahī shaam hī to hai

ek ibtidā-e-sub.h ḳhush-anjām hī to hai

insāniyat kā ḳhuun nahīñ shaiḳh-e-mohtaram

mere subū meñ bāda-e-gulfām hī to hai

tum to ġham-e-hayāt se bachte ho is tarah

jaise ye koī zahr-bharā jaam hī to hai

mere laboñ pe shikva-e-taqdīr to nahīñ

zikr-e-ma.āl-e-gardish-e-ayyām hī to hai

maiñ jab se mubtalā-e-ġham-e-rozgār huuñ

taklīf to nahīñ mujhe ārām hī to hai

jis ārzū-e-shauq se chhūTe na jaañ kabhī

vo ārzū-e-shauq kahāñ daam hī to hai

is naam se ki shā.ir-e-shīrīñ-maqāl hai

terā 'atīq' shahr meñ badnām hī to hai

pamal-e-arzu dil-e-nakaam hi to hai

KHush hun ki ye bhi ishq ka anjam hi to hai

go zindagi ki sham sahi sham hi to hai

ek ibtida-e-subh KHush-anjam hi to hai

insaniyat ka KHun nahin shaiKH-e-mohtaram

mere subu mein baada-e-gulfam hi to hai

tum to gham-e-hayat se bachte ho is tarah

jaise ye koi zahr-bhara jam hi to hai

mere labon pe shikwa-e-taqdir to nahin

zikr-e-maal-e-gardish-e-ayyam hi to hai

main jab se mubtala-e-gham-e-rozgar hun

taklif to nahin mujhe aaram hi to hai

jis aarzu-e-shauq se chhuTe na jaan kabhi

wo aarzu-e-shauq kahan dam hi to hai

is nam se ki shair-e-shirin-maqal hai

tera 'atiq' shahr mein badnam hi to hai