pani mein agar aks ki haalat mein bahun main

paanī meñ agar aks kī hālat meñ bahūñ maiñ

mumkin hai kināre kā kināra hī rahūñ maiñ

ai ḳhāma-gar-e-vaqt mujhe izn-e-suḳhan de

tujh se tirī rif.at ke tavassul se milūñ maiñ

chaltī huī bātoñ meñ use kaam paḌe yaad

Thahre hue lafzoñ meñ ijāzat kā kahūñ maiñ

bīnā.ī ko tarsī huī be-rangī ke dar par

āñkhoñ kī asīrī meñ likhī nazm paḌhūñ maiñ

āvāzoñ ke jathe meñ tirā lahja parakhte

ḳhāmoshī se phailī huī ḳhāmoshī sunūñ maiñ

jañgal sī pur-asrār ḳhamoshī liye 'ārish'

jharne kī tarah shor machātā bhī rahūñ maiñ

pani mein agar aks ki haalat mein bahun main

mumkin hai kinare ka kinara hi rahun main

ai KHama-gar-e-waqt mujhe izn-e-suKHan de

tujh se teri rifat ke tawassul se milun main

chalti hui baaton mein use kaam paDe yaad

Thahre hue lafzon mein ijazat ka kahun main

binai ko tarsi hui be-rangi ke dar par

aankhon ki asiri mein likhi nazm paDhun main

aawazon ke jathe mein tera lahja parakhte

KHamoshi se phaili hui KHamoshi sunun main

jangal si pur-asrar KHamoshi liye 'arish'

jharne ki tarah shor machata bhi rahun main