pani pe numudar kabhi gul mein numayan

paanī pe numūdār kabhī gul meñ numāyāñ

honā hai agar tujh ko to ho dil meñ numāyāñ

maiñ ne use dekhā hai kisī aag kī lau meñ

maiñ ne use dekhā hai kisī til meñ numāyāñ

ye ab jo tire pahlū meñ baiThā hai koī dost

ik roz yahī hogā muqābil meñ numāyāñ

vo aur kisī tarz meñ mumkin hī nahīñ thā

jo zaḳhm huā tauq-o-salāsil maiñ numāyāñ

ik ism pe mauqūf haiñ sab kār-e-'adālat

phir faisla hogā haq-o-bātil meñ numāyāñ

'kaunain' 'alāmāt-e-sitam karb-o-balā meñ

maqtūl se baḌh kar huiiñ qātil meñ numāyāñ

pani pe numudar kabhi gul mein numayan

hona hai agar tujh ko to ho dil mein numayan

main ne use dekha hai kisi aag ki lau mein

main ne use dekha hai kisi til mein numayan

ye ab jo tere pahlu mein baiTha hai koi dost

ek roz yahi hoga muqabil mein numayan

wo aur kisi tarz mein mumkin hi nahin tha

jo zaKHm hua tauq-o-salasil main numayan

ek ism pe mauquf hain sab kar-e-'adalat

phir faisla hoga haq-o-baatil mein numayan

'kaunain' 'alamat-e-sitam karb-o-bala mein

maqtul se baDh kar huin qatil mein numayan