panw dekhegi na taKHir ka dukh samjhegi

paañv dekhegī na tāḳhīr kā dukh samjhegī

kaise manzil kisī rah-gīr kā dukh samjhegī

kab samā.at pe koī harf-e-sadā utregā

kab vo dastak mirī zanjīr kā dukh samjhegī

aks kar dūñgā maiñ dīvār par apnā chehra

aur duniyā ise tasvīr kā dukh samjhegī

hañste hañste hī sunegī vo mirī ġhazloñ ko

phir mire dard ko bhī miir kā dukh samjhegī

kaise aurāq batā.eñge kahānī merī

diary kyuuñ mirī tahrīr kā dukh samjhegī

maiñ virāsat meñ milā tāj-mahal huuñ us ko

mujh ko hāregī to tasḳhīr kā dukh samjhegī

mujh ko bhūlī hai jo shohrat ko asāsa jaane

ḳhud se bichhḌegī to tash.hīr kā dukh samjhegī

panw dekhegi na taKHir ka dukh samjhegi

kaise manzil kisi rah-gir ka dukh samjhegi

kab samaat pe koi harf-e-sada utrega

kab wo dastak meri zanjir ka dukh samjhegi

aks kar dunga main diwar par apna chehra

aur duniya ise taswir ka dukh samjhegi

hanste hanste hi sunegi wo meri ghazlon ko

phir mere dard ko bhi mir ka dukh samjhegi

kaise auraq bataenge kahani meri

diary kyun meri tahrir ka dukh samjhegi

main wirasat mein mila taj-mahal hun us ko

mujh ko haaregi to tasKHir ka dukh samjhegi

mujh ko bhuli hai jo shohrat ko asasa jaane

KHud se bichhDegi to tashhir ka dukh samjhegi