panw jab ho gae patthar to sada di usne

paañv jab ho ga.e patthar to sadā dī us ne

faisla karne meñ ḳhud der lagā dī us ne

ab jo āñkhoñ meñ dhuāñ hai to shikāyat kaisī

yaar ḳhud hī to charāġhoñ ko havā dī us ne

ye alag baat ki vo merā ḳharīdār nahīñ

aa ke bāzār kī raunaq to baḌhā dī us ne

koī shikva na shikāyat na vazāhat koī

mez se bas mirī tasvīr haTā dī us ne

raat zanjīr kī āvāz jo kuchh tez huī

sub.h dīvār pe dīvār uThā dī us ne

sirf ik raah alag thī vo mire 'ishq kī raah

aur vo raah bhī duniyā se milā dī us ne

mere ham-rāh zarā der ko chal kar 'tāriq'

aur kuchh vaqt kī raftār baḌhā dī us ne

panw jab ho gae patthar to sada di us ne

faisla karne mein KHud der laga di us ne

ab jo aankhon mein dhuan hai to shikayat kaisi

yar KHud hi to charaghon ko hawa di us ne

ye alag baat ki wo mera KHaridar nahin

aa ke bazar ki raunaq to baDha di us ne

koi shikwa na shikayat na wazahat koi

mez se bas meri taswir haTa di us ne

raat zanjir ki aawaz jo kuchh tez hui

subh diwar pe diwar uTha di us ne

sirf ek rah alag thi wo mere 'ishq ki rah

aur wo rah bhi duniya se mila di us ne

mere ham-rah zara der ko chal kar 'tariq'

aur kuchh waqt ki raftar baDha di us ne